Waxaa maanta guud ahaan joogsaday duulimaadyadii garoonka diyaaradaha Sayid Maxamed Abdulle ee magaalada Kismaayo ee xarunta dowlad goboleedka Jubaland.
Warsaxaafadeed kasoo baxay hay’adda duulista rayidka Soomaaliyeed ayaa lagu sheegay inuu duulimaadku u istaagay sababo la xiriiro badqabka diyaaradaha, kadib markii cabsi soo wajahday shirkaddaha diyaaradaha leh.
Hay’adda ayaa sheegtay in shalay magaalada Kismaayo xoog lagu afduubtay diyaarad ay leedahay shirkadda Hala Airlines, iyada oo lagala wareegay qalabkii isgaarsiinta, taasi oo ay sheegeen inay halis gelisay amniga diyaaradda iyo rakaabkii saarnaa.
Sidoo kale, hay’adda SCAA ayaa tilmaamtay inay degdeg u bilowday baaritaanada laga maarmaanka u ah dhacdada shalay.
Wararka ka imaanaya magaalada Kismaayo ayaa sheegay in dad shacab ah oo isugu jira dhaawac, bukaan iyo waayeel oo sugayey inay safraan ay ku xayiran yihiin garoonka diyaaradaha Kismaayo.
Horseed Media
